MB informiert

aloha ier arme lüt dihai…

jo, es tuetmer leid dasi mi scho so lang nüme gmolde han, und nei, ich han nöd nume d fraue im chopf und schriebe drum nüme ! d zit goht eifach unglaublich schnell verbi do in Hawaii und es isch eifach so viel los dasi chum zum schriebe chume… Fettes Entschuldigung a alli die wo immer gönd go d Homepage checke und jede Tag enttüscht worde sind!

Ich bin jetzt mittlerwile scho bald 2 Mönet do und mini/üsi Zit neigt sich bereits langsam am endi zue, am Fritig hani nämli scho min letschte Schueltag… Hmm, was isch eigetli so glaufe sitem letschte Itrag *überleg*?

Selbstverständlich gangich fliessig id Schuel. Mini Klass bestoht us 7 Lüt, 6 devo Schwizer… Bin am Afang recht enttüscht xi, das’ nöd chli internationaler xi isch, aber mittlerwile hanich mich demit abgfunde. Ide Schuel isch aso sowit alles bestens, und i bin Zueversichtlich dasich d CAE-Prüefig im Dezember schaffe obwohli nume en halbe Kurs mache und mini Ufzgi nöd immer mache…

Vor 3 Wuche isch d Patricia do acho… Eigetli wärs planet xi das sie erscht chunnt wän ich d schuel fertig han, aber me händ den spontan entschiede das das z spoht isch ! Sie hätsich mittlerwile guet igläbt do, au wän sie glaub nöd ganz so begeisteret isch vo Hawaii wie ich, aber vilicht meini das au nume !

Üsen Alltag do bestoht us Schuel, Strand, Tennis, Surfe (jo, ich han agfange und nei, ich bin nöd talentiert), wäsche ;), esse, esse, esse und trinke (ich bin noch wie vor begeisteret vom Hawaiianische Bier). Aber natürlich gits do mega viel z xeh und z mache, so simmer zb. vorletscht Weekend für 3 Täg uf

Big Island
Am Samstig 11. Oktober isch uf Big Island de Event schlichthin xi: de Ironman Hawaii!! Das händ mier (7 Lüt vo üsere Schuel) zum Alass gno zum es verlängerets Wuchenend uf Big Island z verbringe. Do mer am Samstig morge früeh händ müse uf de Flughafe hani in Waikiki gschlofe, wod Patricia ires Appartment hät… Logischerwis hanich am Fritig morge früeh vegässe de Pass izpacke und han dementsprechend de Fritig nomitag mit Busfahre verbrocht (wär kein Chopf hät, hät Bus, mann!)… Am Samstig simmer aso uf Big Island gfloge und händ döt de erst Tag demit vebrocht, (chranke) Lüt bim schwitze zuezluege… Isch schono idrücklich xi: die Schwimmet 3.8 km, den fahrets 180km velo und werum nöd auno en Marathon renne am schluss? - und das bi gfühlte 50 Grad…

Am Sunntig simmer in Vulcano National Park, für en ca. 2 Stunde-Hike (Wanderig)… Isch auno interessant xi, wie d Bilder (wo hoffetli ide nöchste Täg folget) beleget. Am obed simmer a sonen Ussichtspunkt womer hät chöne luege wie s Lava is Meer flüsst - WOW!!!

Am Mäntig simmer zerscht i sonen ‘Hot Pool’ go bade… Das händ üs die Lüt womer binene übernachtet händ empfohle, hätmi/üs aber nödso usde Socke ghaue, isch hald eifach künstlich xi. Nochhär hämmer üsi Gruppe ufgsplittet (me händ 2 Autos gmietet gha). Während di einte anen schwarze Strand sind, händ d Patricia, de Phil und ich beschlosse, uf de Mauna Kea, mit 4200 Meter de gröscht Berg uf Hawaii, z goh. Allerdings hämmer im Reisefüerer gläse dasmer ohni 4Radatrieb nume bis uf 2500 Meter ufe chunt, zum Visitor Center. Womer den aber döt xi sind hämmer entschiede das üsen Ford Mustang doch eigetlich öppe s gliche isch wienen 4WD, und so simmer den hald glich ufe… Ufde Schotterstross hämmer üs den tierisch gfreut gha dasmer no gschwind zwei Jeeps stoh loh händ! (Etz weissi au werummer nie sött en Mietwage Occasion chaufe !

Isch aso ganz es glunges Weekend xi!

Es witers Highlight isch de letscht Sunntig xi, womer sind go Skydive! Isch eifach unglaublich xi! Das Gfühl vo dene 50 Sekunde freie Fall, eifach unbeschrieblich… und den das Panorama… Ich wür am liebste gad nomol goh!!!!

Jo, soviel zur Vergangeheit… Üsi witere Plän xehnd wie folgt us:

Samstig, 25.10. bis Donschtig 30.10.: 5 Täg Maui, zum chli relaxe… schliessli simmer scho recht gstresst vo dene 4 Stund schuel pro Tag

Donstig, 30.10. bis Donstig 13.11.: 2 Wuche Waikiki, schliessli müemer no en huufe mache und aluege…

Donstig, 13.11. bis Fritig 14.11.: Flug noch Vancouver

Fritig, 14.11. bis Fritig 21.11.: 1 Wuche Vancouver (Schliessli müemer üs wider as Sch…witzer Wetter gwöhne)

Samstig, 22.11.: Akunft ide Schwiiz…

So, ich glaube das ischs für de moment… I weiss nonöd öbi nomol dezue chume zum was in Blog ineschriebe während de letschte Wuche, aber wän nöd sindmer jo bald wieder dihai me chönd eu di letschte vier Wuche mol bimene Kafi, Bier, BBQ, Raclette oder eifach suss irgendwenn vezelle…

Also bis bald…
Manuel (& Patricia)

Joo, do bini widermol… Han denkt ez schriebi wiedermol was, nochdem sich di erste erkundiget händ öbi eigetli no lebe.

I bin jetzt bereits einehalb Wuche do in Hawaii und es gohtmer super, um das gadschomol vorneweg z näh.

Aber de Reihe no. Stoh blibe bini nämli in
SAN DIEGO
I weiss nöd gnau wasi alles gschriebe han und bin au z fuhl zum das nomol noläsä, aso nöd bös werde wäni ez öppis zum zweite mol vezelle….

In San Diego simmer vom 25. bis am 28. August xi. Wieni glaub scho im letschte Itrag gschriebe han, hanimer mega viel versproche vo San Diego. Und i chan aso nume bestätige wasi ghört han. De Kevin und ich sind im Gaslampe Quartier xi, im Sea World und me händ e Haferundfahrt gmacht. Langwilig isches üs aso nöd worde, und me händ en Huufe xeh. Während ich vorallem vode Stadt an sich und de Ambience mega beidruckt xi bin, isch am Kevin sis Highlight glaubs de SeaWorld bsuech xi (@kevin: bitte korrigiere wäni ‘n Scheiss schriebe…).

Los Angeles
Am 28. gäg de Obed simmer den wieder noch LA gfahre. Döt hämmer üs vo üsem Dodge Charger, wo üs de ganz wäg dure begleitet hät, trennt. Isch üs fascht chli nöch gange, hämmer doch immerhin fascht 5′000 Kilometer zrugg gleit mitem.

Wär schomol in LA xi isch, weiss, das en Bsuech ide Universal Studios es absoluts MUSS isch. Me händ üs entschiede, zum de 29. August für das z nutze, und so isch üs den am Morge früeh (9ni) en Shuttlebus go abhole cho. Am Vortag hämmer üs no gfroget öbmer echt de ganz tag durebringet ohni das’ üs langwilig wird (de Shuttlebus isch ersch am Obed wieder retour), schlussentli hämmer den aber müese pressiere damitmer no rechtzitig wieder vorem Park usse stönd :)! Für die wo d Universal Studios nöd kenned: isch en Vergnüegigspark bide Universal Studios in Hollywood mit vielne veschidene Attraktione und de Möglichkeit en Blick hinter d Filmkulisse z werfe.

Noch dem super Abschluss vo üsem Trip, binich den am Samstig witer noch Hawaii gfloge.

Hawai’i

ersti Idrück
Nocheme knappe 8-Stunde-Flug binich in Honolulu am Obed am achti, Ortszit, acho. Mini Gastfamilie hät mich am Flughafe abgholt. I wohne in Kailua, das isch e chlini Stadt, öppe 50 Autominute vo Honolulu entfernt. In Kailua häts 2 Beaches, de eint devo sig super zum Windsurfe, hani ghört. Am Sunntig hätmer min Hostfather, de Myles, chli d Umgebig zeiget. Am Mäntig denn (isch gad en Fiirtig xi), häter mi an Hanauma Bay mitgnoh. Hanauma Bay isch e Bucht wo (vor allem bi Touriste) bekannt isch als Schnorchel-Paradies. Tatsächlich hämmer en huufe, mega schöni Fisch xeh. Am Zieschtig letscht Wuche hani den s erste Mol id Schuel müese, meh dezue biz spöter…

D Gastfamilie
I bi ehrlich xeit scho chli nervös xi betreffend Gastfamilie. I han bis jetzt nume jewils für churzi Zit inere Gastfamilie glebt (England und Frankrich), und has eimol guet und eimol nöd so guet preicht…

Mini Nervosität hätsich als unberechtigt usegstellt… S Sakaguchi’s händ mi am Flughafe abgholt und mi mit offne Arme empfange. I mue sägä, das macht einiges viel liechter inere neue Umgebig, wänmer öpper hät wo eim chli d Umgebig, d Kultur und Lebenswis zeiget.

Mini Hostfamily, das isch de Myles, d Gale und de Evan (de 11jöhrig Sohn), händ japanischi Wurzle, lebet aber scho öppe ide 3.-4. Generation do in Hawaii. Si händ beidi es eigets Gschäft und sind eigetli mega busy, aber trotzdem simmer mega viel am plaudere, was natürli sensationell isch für mis Englisch. Alli drü sind mega flott und unkompliziert.

D Schuel
I bsueche s ICC in Honolulu, e Sprochschuel mit genialer Lag und Meerblick vode meiste Schuelzimmer… De Schwizer-Ateil isch recht hoch, das hani aber erwartet. Umso erstunter bini den xi das i minere Klass näbst mier nuno ei Schwizerin isch, e Welschi… Trotzdem isch Schwizerdütsch ide freizit nöd ganz unvermiedbar… I probieres aber so fescht wie möglich izschränke…

Di erste zwei wuche hani en ganz normale “Halbintensiv-Kurs” bsuecht, i han vo Mäntig bis Fritig jewils vom halbi 9ni bis am Halbi 1 Schuel. Isch genau richtig so :)! Nöchst Wuche fangi den min Advanced-Kurs ah, woni für 6 Wuche belege… Eigetli gängt de 12 wuche, i mue aso worschindli luege dasi ab und zue chli büffle (*meo föäächts*)… I hoffe de Schwizer-Ateil halti sich au döt in Grenze, aber ehrlich xeit glaubi nöd so dra… I’ll see!

Hawai’i

I weiss nöd öbi i dem Blog s wort Paradies schomol brucht han, aber Hawaii isch eifach s ultimative Paradies.

• In Hawaii gilt “5-10 Minuten nach der Zeit, ist noch immer Pünktlichkeit”… Die wo mich kennet wüssed, das mier das würklich entgege chunnt…
• D Natur isch eifach umwerfend: ide nöchi vode Berge, ide Mitti vode Insle, xehts us wie im Regewald (es schiffet döt au öppe so viel, vielicht chunt das vo dem!?), de Küste entlang gits Duzendi vo schöne, herrliche und traumhafte stränd.
• S Wetter würich nöd andersch mache wänich Petrus wär: all paar Täg wieder mol 10 Minute rege, und suss Sunne und ständig umdi guet 30 Grad.
• D Lüt sind mega offe und fründlich. Si strahled e Rue und Zfrideheit us womer sich als Westeuropäer überhaupt nöd gwöhnt isch.
• Aloha Lifestile: D Hawaiianer bringt eifach nüt usde Rueh; egal ob im Football Stadion, am Strand oder im Verkehr (Hupe, was isch das?)…
• Tailgating vorem Football match: E Tradition womer ide Schwiz unbedingt au sötti ifüere!!! Me mues sich das so vorstelle:
  Ca. 4-5 Stund bevor de Match afangt trifft mer sich vorem Stadion ufem Parkplatz. Den stelltmer es Pavillon-Zelt, en Tisch, es paar Stüel und en Grill uf. D Zit bis zum Spiel verbringtmer mit grilliere, esse, Bier (bzw. Wasser fürd Chind) trinke, schwätze, spiele usw.! *kaumaufdasnächstespielwartenkann*!

Und ez?
Jetzt gangi go Tennis spiele (Tennis Courts ghöret do übrigens zude Stadt-Infrastruktur und sind logischerwis gratis)… Am erste Oktober chunt d Patricia übere mier chli go Gsellschaft leiste. Si goht auno 3 Wuche id Schuel und nochhär stoht no 1 Wuche Maui, 2 Wuche Waikiki und 1 Wuche Vancouver ufem Programm, bevors wieder haizue goht…

I hoffe bi eu dihai isch au alles Palletti, abxeh vode Fuessball-Nati (die elende Habbasche)… Übrigens isches okay zum Kommentär schriebe, gäl Maja ;-)!

Wow, immerno am lese… Respekt… I hoffe me vestoht einigermasse chli wani gschriebe han, mis Dütsch isch teilwies bedenklich (han öppe die mol müse hirne wiemer ez das uf dütsch schriebt)…

Bis Bald! (Fötteli söttet demnächst no folge haets au no neui gaeh)

So ier Homies

i han denkt i chöntmi eigetli widermol melde, isch ez doch au scho es zitli här… han übrigens no neui bilder ufeglade!

Wasi no möcht festhalte betreffend em letschte itrag isch: 1. hät de Kevin amel länger zum dusche als ich und 2. hani eifach döt gad müse min Samichlausbart abrasiere!

Santa Cruz isch super xi, recht mediterran, hätmer no gfalle döt… Aber isch hald chli chalt xi! Chalt heisst me hät am obed müse en Pulli und langi Hose alegge…

Noch zwei Täg Santa Cruz simmer den witergfahre richtig süde, ufem Highway No. 1. Isch en megaschöne Abschnitt südlich vo Santa Cruz, d Stross isch direkt ade Küste und es hät immer wieder so Ussichtspünkt womer chan usefahre und chli di schön Landschaft gnüsse.

Bi üserne witere hält in Monterey, San Simeon, Morro Bay und Pismo Beach isch den immer bizeli wärmer worde, und in Santa Barbara - wo de Kevin jo sin Sprochufenthalt absolviert hät - isch den schowider richtig agnehm xi. Und i mue würkli sägä, je südlicher desto schönner isch d Westküste.

Am Fritig simmer den witer noch Camarillo, womer am Samstig is Outlet sind go shoppe. Isch recht astrengend xi, und i chan sägä me händ üs würkli zämägno und nöd allzu viel kauft…

Noch Camarillo simmer den witer uf Santa Monica, und langsam sind di richtig schöne Stränd cho… Malibu hät zum Bispiel einiges z Büte. Entsprechend au a schöne Hüser. OK, Hüser isch vilicht chli übertriebe, Malibu isch e anenanderreihig vo Paläst… Unglaublich… Natürlich hämmer üs mitem Sunntig au gad de best Tag usgsuecht zum an Strand go, d Stränd sind jo au überhaaaaaaaaaupt nöd überfüllt xi ;-)!

Mittlerwile simmer in San Diego aglangt! Vo dere Stadt hämmer bzw. han ich mier bsunders viel versproche, händ doch alli immer so vo SD gschwärmt! Und das womer bis ez xeh händ isch schomol nöd schlecht xi, me sind aber ersch fängs im Gaslamp Quartier xi, s “Do-isch-de-Bär-los-Quartier” vo San Diego. Me händ ez no 2 Täg Zit zum San Diego erkunde, bevors nochhär wieder zrugg noch Los Angeles goht. am Samstig flügi den bereits uf Hawaii und nöchst Mäntig fangt den auscho mini Schuel ah. Irgendwie schad isch de Trip scho bald z End, aber anderersits isch au wiedermol e schöni Vorstellig, e festi Blibi z ha.

So, jetzt hauis aber langsam is Näscht… En schöne Tag eu allne und i hoffe eu gohts guet. Danke übrigens fürd Mails, gibmer müe zums inere agmessne Zit z beantworte ;)!

Gruuuuuuuuuuuuuuuuuuuuuuuuuuuuuuuuuuuuesss

jo also denn, de mb isch gad under de tuschi und het die glohriich idee gha, dass ich mol öppis söll schribe so probieri ez mol es paar sätzli z’mache:

me sind denn aso noch üsem foto-shooting am donschtig morge in sacramento so um de mittag abgfahre richtig frisco. noch ca. 80 meile hemmer denn mol de erschti “küschte-nebel” gsichtet und wider emol de pazifik xeh. nocheme tiptope durchfahre vom downtown simmer gad vors hotel, wommer vo sacramento us reserviert hend, anegfahre. isch jo wider mol alles usbuechet xi und mir hend nüme gross chöne wähle. nöd so schlimm, hemmer denk. schliesslich jo e hotel, oder? es het sich den usegstellt, dases es huere sau-loch xi isch! eso richtig “grüüsig”. und denn nöd öppe günschtig. wie au immer, me sind denn am obig is kino und hend xait: am morge möglichscht schnell uschecke. da hemmer denn au gmacht und sind mit somene “sightseeing-bus” quer dur frisco und alli die wunderbare sehenswürdigkeite go ahluege. isch recht praktisch xi, hesch aifach chönne usem bus wenn der öppis passt het. i ca. 30 min isch nemmlich scho wider de nöchscht cho wod aifach wider hesch chönne ihstige. drumm hemmer denn üs entschide, dasmer bi de fisherman’s wharf en stopp mached und gönd go esse. zerscht aber simmer no 8 block de hügel uuf tschalppet go d’lombard-street ahluege. en schöne ahblick, mit wunderbare blueme und rote verbundstei. laider isch nöd gad e grobi shelby cobra (da wär denn es auto…wer wunderets) oder so dirab gfahre…bi do scho gad chli deprimiert xi;) aber de mb hett mich denn wider tröschtet…nochem mittag esse hemmer am pier au no en huufe seelöwe xeh. die fühlet sich döt offebar sehr wohl und sind mit de mensche (vorwiegend turischte) recht vertraut. nebet dene vilne usgwachsne seelöwe, hets au mol no öppe de eint oder ander “chlii” seelöwe gha (mega “jööhh”). womer denn aso d’goldegate-bridge im volle nebel (nöd so recht) xeh hend, diversi cable-car krüüzt und vili schöni pärk xeh hend, simmer zum charger gange und hend gfroget öber üs uf santa cruz mitnimmt. natürlich hetter zuegstumme und so hemmer üs us dere grossstadt  entfernt und sind möglichscht schnell uf de hwy. #1 richtig santa cruz. leider üblich für northern california isch de küschte-nebel. drumm isches nöd nume in frisco maischtens neblig, sondern au no es paar meile richtig süde. das hemmer denn wider mol festgstell uf em weg noch santa cruz. me hend zwor faszinierendi klippene und e zimmlich ruchs meer chönne ahluege. allerdings hett sich de blick id ferni i grenze ghalte, do de nebel starch überwoge het. noch ca. 70 meile hemmer den das gmüetlich örtli, nammens santa cruz erreicht. me hend e tolls hotel gfunde und üs entschide, dasmer üs do für 2 nächt nider löd. zu üsere überraschig hez gad 5 fuess-min. vo üsem hotel en vergnüegixpark direkt am meer. natürlich simmer denn döt scho mol no go luege (das glueget wode isch) und hend üs bi autorenne am computer und bowlingspile wunderbar amüsiert. nöd zletsch hets aber au guet tue zum wider mol chli “raschte” (i weiss, wer raschte, roschtet. aber gliich…) wiener xehnd goht üs aso immer no guet und mir gnüssed das ganzi i volle züüg. morn gohts denn wider wiiter, wer weiss wo ane…. am beschte leset ers aifach wider mol noh…i gang ez mol go luege wo de mb isch. mi tunkts de isch scho huere lang am dusche;) und denn hani gad au no en grund zum de ihtrag do z’beende….;P  bis zum nöchschte mol!

Soo, do bini wider…. Sitem letschte bitrag isch nonöd so lang här, aber doch simmer scho recht wit cho!

Am Fritig, 8. August simmer vo Los Angeles uf Las Vegas gfahre. In Vegas simmer den au 2 Nächt blibe und händ de Strip unsicher gmacht. Gewaltig alli die Liechtli und BlingBling-Sache. Zur Zit isch gad Hauptsaison, und es hät en Huuufe Lüt gha. Die zwei Täg in Vegas hämmer eigetli vorwiegend mit laufe, trinke (es isch brutal heiss xi), und laufe verbrocht. Am letschte Tag hani sogar no en super Quiksilverlade gfunde: D Flipflops woni döte kauft han hani inzwüsche bereits nümme, han si ufere Raststätte ligge loh (Frog mi nöd wie so öppis goht).

Vo Vegas simmer den am 10te August witergfahre an Grand Canyon. De hämmer den au pünktlich zum Sunneuntergang erreicht. Sehr imposant xi. Eigetli hämmer den wöle i de Lodge döt übernachte, aber natürli häns kei vacancy me gha, und so simmer wieder zrugg gfahre, zum nöchste Ort. Die Fahrt isch alles andere als gmüetlich xi, simmer doch beidi scho recht müed xi vomene ganze Tag autofahre… Dezue isch no cho das all zwei-drü Meile wiedermol es paar Reh ufde Stross gstande sind. Jänu, me händ den kei Unterkunft me gfunde und händ im Auto übernachtet. Isch nöd soo de wahnsinn xi…

Nochere churze und astrengende Nacht (i ha nüme gwüsst wie ligge), simmer am Mäntig Morge richtig Bryce Canyon düset. Me sind zum Glück bi Zite döt xi und drum vode Büss voll Touriste verschohnt worde. De Bryce Canyon isch no fast idrücklicher xi als de Grand Canyon. Bim Bryce Canyon hät üs vorallem d Schönheit beidruckt, währenddem de Grand Canyon eifach meega gross und tüüf isch. Natürlich isch au d Lodge im Bryce Canyon usbuecht xi und so simmer um de Mittag wider losgfahre, richtig Küste. Die Stross isch unglaublich xi: Meile um Meile simmer gfahre; keis Hus, kei Zivilisation, eifach nume d Stross und so all halbstund mol es Auto wo entgegechunnt. Und das mehreri Stunde lang. Me händ den denkt, me tüend im erste Dorf (Baker) noch dere Durststrecki widermol en Rast ilegge und übernachte. Womer den dötte xi sind hämmer müese feststelle, dases genau eis Motel und no 3-4 anderi Hüsli i dem “Dorf” gha hät. Natürlich isch au das Motel usbuechet xi (hät glaub au nume öppe 4 Zimmer gha). Zum Glück isches nonöd allzu spoht xi und me händ problemlos no chöne die 65 Meile noch Ely fahre. Das isch den scho bedütend grösser xi und me händ sogar es Motel gfunde…

Am Ziestig Morge früeh (find ich zumindest), hämmer Ely wieder verloh und sind noch Reno gfahre. Reno isch e chlises Städtli gad ade Grenze vo Nevada zu California. Nochdems im erste Motel kei Platz me gha hät, hämmer den denkt frogemer mol was e Nacht im Riese-Hotel näbet dra chostet, und siehe da, für en günstigere Pries als s Motel in Ely hämmer imene super Hotel chöne huuse mit Casino und jenste Restaurants. Scho lustig mängmol. Nocheme feine Znacht simmer den no ad “Flusspromenade” eis go trinke. Am Mittwuchmorge isch de Kevin no is Automuseum, während ichs vorzoge ha zum nochli ligge bliebe ;)…

Nochem Mittag simmer den witer noch Sacramento. Jo, San Francisco chunnt langsam aber sicher in grifbari nöchi… In Sacramento - hämmer denkt - gits nöd so viel z xeh, do chammer d Kamera im Hostel loh - hämmer denkt. Isch en chline Irrtum xi, in Old Downtown Sacramento chunntmer sich nämli vor wie imene Western: Holzigi Trottoirs mit dene Schilder wo abehanget und sogar en chline Bahnhof häts no. Ez müemer hüt den glich mol no mitem Fotiapparat loszieh, und ohni Flipflops, die hani nämli wie xeit es paar Meile vor Reno ligge loh…

So das wärs widermol vo mier… Ich xeh gad, bi eu spielt s Wetter nöd so mit… Isch ebe richtig ;)!

Bis zum nöchste mol!
Manuel (ohni Flipflops)

soo, i hans gschafft! I bin geschter Mittag do in Los Angeles acho. Es isch bi üs jetzt Fritig Morge am 9.15 und me fahred hüt los noch Las Vegas. Aber alles de Reihe no…

Mini Reis isch ganz schön Abentürlich xi! Me (=d Patricia und ich) sind gester Morge churz vorem 3 ufgstande und uf Friedrichshafe gfahre. Döt acho, hani min Koffer unter de Arm gno und me sind zum Check-in-Desk. OK, ich han de Koffer nöd unter de Arm gno, ich hanen zoge… However, ich han glueget woni ez mues ichecke, do seit d Patricia ufsmol: “Du, din Flug isch annulliert…”. Ich denk nume so: “Aaah, sehr witzig, de Lufthansa-Streik-Witz… Würklich sehr witzig, haha”. Es hät sich den usegstellt, dases kein Witz xi isch, die Pilote händ tatsächlich gstreikt. Jänu, den hänsmi sofort ines Taxi vefrachtet und i bin mitem Taxi noch Frankfurt gfahre. Naja, eigetli chamer dem au fasch gfloge sägä, me sind zitewis mit 220 unterwegs xi… Z Frankfurt hani den chöne ichecke.

Bin schono froh xi, hät das alles klappet und i han min 10ni Flug noch LA verwütscht. Ich hanmer den uf jede Fall vorem Abflug no es Bierli gnemiget und mich über seltsami Blick gwunderet. Han ersch nochhär gmerkt dases ersch nüni xi isch und worschindli nöd alli so lang ufde bei xi sind wie ich.

De Flug ischden ohni Problem velaufe, au wäni chli en doofe Platz übercho han (ide mitti vom Gang). S Unterhaltigssystem isch au chli en Reinfall xi, und s esse bi witem nöd so guet wie bi mim Letschte Flug (mit de Emirates uf Australie).

Nochdemi z LA dur die 7 Passkontrollene, Visum-Stempel-Schalter usw. bin hät de Kevin scho, wie versproche, im Schniedersitz uf mich gwartet (*insider*). I mues aso sägä, bis ez erwiester sich als super Guide. Noch minere Akunft simmer zersch is Hotel, händ d Lag besproche, üsi Route definiert sind (aso ich bin) in Pool e abchüelig go näh. Nocheme Subway-Sandwich hani gfunde an strand wär no läss. So simmer mit üsem Dodge Charger (wo de Kevin bereits organisiert hät) an Strand gfahre. Scho wahnsinn, wie gross LA isch. Me sind eigetli no recht nöch am Strand, gemäss Charte, und trotzdem simmer e Halbstund Auto gfahre.

So, das wars bis jetzt vo minere Site. Ich hoffe bi eu dihai isch au alles in Ornig!

Grüsse aus Los Angeles
“Derjenige, der heute auf das Frühstück verzichtet”

morn gohts los…